Di Reis zum Schiff isch äs chlises Abentür gsi, äs het scho bim Flughafe Züri agfange. Ds Check-in ohni Visum u Rückflug sig eigentlech nid müglech hei si mir am Schauter gseit. Aber nach mehrmaligem düreläse vo dä Dokumänt wo Mercy Ships mir zuegsändet het, hei si mi de düreglah.
Z'Nächste isch de dr Flughafe Züri säuber gsi, für 90 Min het kes Flugzüg chönne abhäbe u somit het säch mi Flug nach Istanbul um 2 Stung verschobe. Womit mi Transitzyt dert nur no 40min isch gsi, was für ä eint oder anger nach vieu tönt. Aber i äme settige Flughafe chaisch guet lenger aus ä Stung ha für z'Umstige. Mit vieu Rennä u Gebät het äs doch no glängt.
Bim Borde vom zwöite Flug isch de Frag nomau uf cho ob ig ä Rückflug ha. Ig bi afe chli müed vo auem bi gsi, u ha nüt angers gwüsst aus z'säge (I'm going with a ship auso I gah mit eme Schiff hei)😅 u de het är de nume Türkisch mit öberem gret u mi düre gwunke.
Z'Madagaskar bi ig de sehr härzlech empfange worde u ha de d'Nacht in Antananarivo i mä Hotäu verbracht.
Am nächste Tag si mir de mit äm Bus nach Toamasina gfahre, was nume 335 km wäre, wo aber üs 13 Stung brucht het. Zum Glück ha ig ä Guete Mage gschänkt becho, wo äs paari leider sehr hei müesse liide.
D'Fahrt isch zimlech idrücklech gsi. Am Strasserand si vieu eifachi Hüttli gsi. Aber d'Mönsche hei eimä äs Lächle gschänkt u mit Fröid gwunke. Uf dr angere Sitte si aber o die viele Lastwäge gsi, wo mir du leider ou 4 Unfäu gseh hei. Mi hei dörfe bewahrt bliebe u si du zimlech spät uf äm Mercy Ship a cho.