It'z si di 6 Mönet scho verbi. Dr letscht Monät isch zimlech intensiv gsi. Mi si vo Madagaskar furt gsäglet, 5 Tag si mir ungerwägs gsi. Z'Sägle isch zimlech äs Abentür gsi, aues isch zu äre Herusforderig worde ömu vorauem o grad z'bache. Aber nid nume das, o z'Stägä loufe u z'Nachtässe het zu dr eint oder andere lustige Situation gführt.
Aber nid für aui isch äs lustig gsi. Sehr vieli si seechrank worde u hei für 5 Täg ihri Kabine nid verlah. U ir Chuchi isch mä froh gsi, für jedi Pouse. Mi isch zimlech müed worde, aber ha dörfe bewahrt bliebe u het mir dörfe guet gah. Ussert das ig mängisch um äs paar Cupcakes ha müesse truure. Aber äs het üs zäme gschweisst, mi het müesse z'zweit wärche, öber het Pfanne u dr anger duet rüehre.
Aber für tieu isch äs villecht unklar wieso mir z'Durban si. AFM muess gwartet wärde, da äs äs zimlech äs auts Schiff isch u süsch würd Lizäns verliere für z'Sägle. I dere Zit si nüme so viu Lüt uf äm Schiff u äs isch ruhiger worde.
Wo mir de z'Durban si acho isch o scho d'Wiehnachte vor dr Tür gstange. Mi hei äs grosses z'Morge Buffet dörfe zubereite u am Namitag het äs de äs grosses Dinner gäh.
Isch sehr spannend gsi mau ume chli verschiedeni Produkt dörfe härzsteue. Ha o dörfe nöi Rezäpt kennä lehre wo mir ir Schwiz nid unbedingt mache wie zum Beispiu Scones.
Ja u när isch äs um z'Verabschide gange. Das Schiff isch zu mä dahei worde o we äs nid geng ifach isch gsi mit o vieu Lüt vo ungereschidleche Kulture zäme z'Läbe. Aber o we das eine vo dä schwirigere Pünkt isch, isch äs glichzitig o ä positive Punkt.
So vieu uf äm Schiff bringi ä Gschicht mit, Gschichte wos wärt wäre z'verzeut z'wärde. Ig wirde das Schiff vermisse trotz aune Heruseforderige, sis doch grad Heruseforderige wo mi am meiste präge u ig eifach aus ha chönne Gott abgäh. Ig ha nid aus i mire Hang u wirdes nie ha, nid aus isch Perfekt u wirds o nie si.
Wis wird witer geit, weiss ig nid aber bi gspannt was Gott für mi parat gleit het. Ä Teil vo mir isch geng no z'Madagaskar, dass ha ig grad eis gmerkt wo mir si Durban a cho si, zrügg ire eher westläche Wäut. Zwar het äs z'Durban o sehr vieu Armut, aber Strasse si perfekt u äs het Verkehrsample u dr Verkehr isch greglet. Das tönt nid nach vieu, aber äs isch komisch wie schnäu mä säch cha a öbis angers gwöhne.
Danke a aui wo dä Blog hei gläse hei u mir zueglost hei. Ig wirde nid witerfahre. Hoffe i ha öich chli ä grobe Idruck chönne gäh vom Läbe uf äm Schiff.
