Sit äs paar Wuche si mir Zweit ir Beckerei.
Was ig sehr froh bi, da mir somit nüme am Fritig müesse z'Brot für ds ganze Wucheend produziere.
U o süsch bringts Erliechterig u mir chöi meh produziere aus nume z'normale Toastbrot.
Adama bringt chli Lockerheit u afrikanischi Glasseheit it Beckerei.
Sie chunnt vo Gambia u het scho für Mercy Ship gwärchet ire chaute Chuchu uf äm Global (ds isch ds andere Schiff wo si no hei). Nachdäm het si de ine dütschi Beckerei i Gambia chönne gah Beck lere. Dert het si ungerangerem o mit äme Schwizer gwärchet. U somit isch si dr Schwizer Änglisch Akzänt scho fei chli gwanet 😅
Was aube ono spannend isch zue z'luege wie Rohstoffe glieferet wärde, wo ig ä Tag vorher muess bsteue.
Mega dankbar bini ou für aui, wo mi ungerstütze vor Schwiz us, mit Tips we ig mau nüme witer weiss.