Ha mi scho lenger nüme gmäudet u ha däicht i gibe mau wieder äs Update, wie äs mir so geit u was ig hie darf erläbe.
Ig schetze die Gmeinschaft sehr wo ig hie darf erläbe o we Gschichte mängisch schwär z'trage si. Vieli wünsche säch chönne uszwandere für säch chönne äs anders Läbe ufzboue u nid ihr Armuet z'läbe. We mä sä fragt was si wärche, bechunsch meistens vieli verschiedeni Antworte. Si verchoufe Chleider, steue Ässe här, wärche näbe bi aus Lehrer und, und, und. Sie si sehr kreativ u vieu wo mit mir wärche hi ä höcheri Usbiudig aus ig. Öber het ä z.B ä Abschluss in Jura. Aber in Madagaskar chunnsch nume mit Bestächig zu äre settige Arbeitssteu.
Aber o we sie säch entscheide z'Land z'verlah, hei si nid immer äs bessers Läbe vor sech. Da si zu mä nä chlinä Lohn agsteut wärde oder aus Legionär brucht wärde ihm Chrieg. Wie zum Bispiu dr Brütsch vo öberem wo mit mir wärchet. Äs muess säch öbis ändere in Madagaskar, wü Madagaskar chönnt äs richs Land si mit au denä Bodäschetz wo si hei.
Ir Beckerei isch fei chli vieu z'tüe gsi, sigs mit Geburtstage oder Verabschiedige. Aber da ig geng cha entscheide was ig wott mache, darf ig chli a Rezäpt experimentiere. U ig probiere ihne o öbis vo däm Wüsse bi zbringr, da sie sehr interessiert si, so vieu wir müglech z lehre.
Hie si no äs paar Impressione.
